बिडाल-मुषिक मिलाप

बिडाल-मुषिक मिलाप (बिरालो र मूसोको मिलन)

...............................................................

आँधिहुरी सहेका क्यै बिरालाहरू भेटियो।
म्याऊँ म्याऊँ गरेका थे, टिठाई घर ल्याइयो।।
आगोको मधुरो राप, दिएरै पनि सेकियो।
उपियाँले घेरेका थे, सफाई पनि पो भयो।।१।।

मार्लान् मूसा भनी तिनै, बिरालाहरू पालियो।
बनढाडे बने उल्टै, चल्लाको त बिनाश भो।।
बच्चाको मुख मारेर दूधभात खुवाइयो।
ओछ्यानैमा गरे बिष्टा, हाम्रै कन्तबिजोग भो।।२।।

कुँडेको तर चोरेर छानामा गइ ढल्किए।
काला-सेता सबै मिले, भन्डारैतिर  पल्किए।।
आफू आफू जुधी फेरी, ङ्यार्रङुर्र कराउँछन्।
घरको जगमा मूसा, देख्दा खेरी डराउँछन्।।३।।

मुसेरीमा कुनै मूसा, झुक्किएर पर्‍यो भने।
यो हो मेरै ठूलै मित्र, भन्दै जाइ छुटाउँछन्।।
साँझ मूसा बिरालाको, देखिन्छ सह-भोजन।
मित्रता दह्रिलो पार्ने, गर्दछन् नित्य चिन्तन।।४।।

साउन २, २०७०

सान सेबाष्टियन, स्पेन