भन्छिन नेपाल आमा
घर कहाँ घर हुन्छ आफ्नै भाइ फुटेपछि
छिमेकीको गाई चर्छ बारबन्धन टुटेपछि
अब आँखा उघार
भन्छिन नेपाल आमाले -२,
सन्तान हो ! आफ्नो घर आफै सिंगार ।।१।।
घर कहाँ रहन्छ र डाँडाभाटा थुत्यो भने
घरमूलीले लुकिछिपी ढुकुटी नै लुट्यो भने
खै त विवेक विचार ?
भन्छिन नेपाल आमाले -२,
सन्तान हो ! आफ्नो घर आफै सिंगार ।।२।।
घरको जग खोक्रो पारी धूरीमाथि चढेपनि
आफ्नै संस्कृतिलाई मासी विदेशी मात चढेपनि
नेपाली त्यो हुन्छ र?
भन्छिन नेपाल आमाले -२,
सन्तान हो ! आफ्नो घर आफै सिंगार ।।३।।
ठाँटिएरै हिंडेपनि लथालिंग घर हुनेलाई
नेपाली भै ठाडो शिर गरी बोल्न डर हुनेलाई
इज्जत कसले दिन्छ र?
भन्छिन नेपाल आमाले -२,
सन्तान हो ! आफ्नो घर आफै सिंगार ।।४।।
जेठा छोरा इटा बोक, कान्छो खाँवा बोकी आओस्
माहिलोले बार बाँध, साहिंलोले छाना छाओस् ।
छोरी घर सिंगार ।
भन्छिन नेपाल आमाले -२,
सन्तान हो ! आफ्नो घर आफै सिंगार ।।५।।
१ फेब्रुअरी २०१३
सान सेवाष्टियन, स्पेन
No comments:
Post a Comment