मृत्यूदेखि नडराऊ
यदि छोराको स्वार्थका लागि छोरीको भविश्य रेटेका छैनौ भने
छोरीलाई काँधमा चढाएर बुहारीलाई जुत्ताले कुल्चेका छैनौ भने
झ्यालबाट कुहेको आलु छिमेकीका करेसामा फालेका छैनौ भने
गरिबको गास खोसेर आफ्नो भकारी भरेका छैनौ भने ।
मृत्यूदेखि नडराऊ
लिएका छैनौ भने– एक रुपियाँ पनि तिम्रो पसिनाले नसिन्चेको
खाएका छैनौ भने – राज्य ठगेको एक कौडी दाम पनि
खोसेका छैनौ भने– बिना पारिश्रमिक एक मिनेट पनि कसैको
चोरेका छैनौ भने– कसैको खुसी एक पलको पनि ।
मृत्यूदेखि नडराऊ
भोक मेट्ने भाग्य नभएकाहरुलाई एक टुक्रा रोटी कहिल्यै बाँडेको भए
दुःखमा डुबेकाहरुको दुखमा एकछिन काँध थापेको भए
खुसी खोसिएकाहरुलाई एक पित्को मलहम लगाएको भए
आफ्ना नहुनेहरुको कहिल्यै आफ्नौ बनिदिएको भए ।
मृत्यू त हाम्रो साथी न हो,
बिचरा जन्मदा देखि नै हाम्रो छायाँ बनेर हिडिरहेछ
एक दिन जिन्दगीले जब हामीलाई धोका दिएर भाग्छ
हाम्रो काँध थाप्न उही मृत्यू त सहायक बनेर आउँछ
उससँगको साक्षात्कार अति प्रेमिल बनाउन सकिन्छ,
नडराउ मृत्यूदेखि – जीवनसँगको साँठगाँठमा कसैलाई ठगेका छैनौ भने ।
फागुन १७, २०६८
सान सेवाष्टियन, स्पेन
२९ फेब्रुअरी, २०१२
Death is inevitable. So, each moments are valuable to make our life memorable and precious.
ReplyDelete