(कमलरी, कमैया, हलिया लगायतका सबै किसिमका अमानवीय दासता बिरूध्द संघर्षरत सबै मुक्तियोध्दाहरूमा समर्पित)
समय-चक्र
वर्षौं वर्ष
तिम्रा छायाँले तर्सियौं हामी
मानौं तिमी बाज थियौ
हामी प्वाँख नभएका चल्ला थियौं
तिम्रा पखेटाका छायाँमा
हाम्रा क्याँकक्याँकहरू
तिम्रा लागि केवल
मनोरञ्जक संगीतका धून हुन्थे।
त्यो पहाडको उकालोमा
तिमी बिसौनीमा थियौ
हामी हातखुट्टाका नङ गाडेर
ढुंगेभीर उक्लन खोज्दा
तिमीले पल्टाएका ढुङ्गाले
थिचिएका
आलै छन् यी नङका घाउहरू।
हामी बाख्रा थियौं
मुहानको पानी पिउंथ्यौ तिमी
र आरोप लगाउथ्यौ-
"तिमीहरुले तल बसेर
माथिको मूल धमिल्याएका हौ ।"
हरेक बिहानले घाम ब्याउँथ्यो
तर त्यो घाम हाम्रो थिएन
प्रत्येक घामको झुल्को
तिम्रै छानामा मात्र
पुस्तौं टल्किरह्यो
पहाडको यस अँध्यारो खोंचमा
हाम्रा भागमा थिए
केवल ठिहिराउने सिरेटोहरू।
टुकी तिम्रै घरमा बलिरह्यो
बिजुली तिम्रै कोठामा पोखियो
हाम्रा स्याउले छाप्रामा
पुत्पुताइरहे काँचा सिठाहरू
हाम्रा छानाको धुँवाकै पनि
बिरोध गर्यौ तिमीले
र थुनायौ बनमाराको आरोपमा।
मानौं यो संसारको हाँसो तिम्रो पेवा हो
यी उब्जाउ पाटाहरूका लालपूर्जाहरू
तिमीले चितामा सँगै लैजाने छौ
तिम्रा सन्तानहरू बाबु-नानी हुन्
हाम्रा बच्चा केवल गोब्रेकीराहरू !?
हामी शीत निद्राबाट ब्यूँझेका छौं अब
ए पहाड! हामी उक्लँदै छौं चुचुरोमा
फुटेका बुढी औंलाहरू
फाटेका पाइतालाहरू
रगतपच्छे किन नहोउन्
रोक्दैनौं हामीले यो यात्रा
हाम्रा पाखुरीहरू पगालेर
सम्याउने छौं त्यो चुच्चे थुम्को
र ठड्याउने छौं खाँवाहरू
जहाँ
हाम्रो आफ्नै घाम हुनेछ
हाम्रा नानीहरूका आँखामा
उदाउने छ कलिलो सूर्य।
अझै पनि
कसैले यी थुम्काहरू
मेरै हुन् भन्छ भने
भत्कने छ त्यो पहाड
र हामी सम्याउने छौं सबै
धुलाम्मे आँखाका परेलीमा
हामीले कोरल्ने छौं नयाँ जून
अब छिर्ने छैन त्यो जून
हाम्रो भत्केको छानाबाट
हाम्रो इज्जतको चियो गर्न
अब हाम्रा नानीहरू छानामै खेल्दै
हत्केलाले जूनको क्षेत्रफल नाप्नेछन्।
त्यस बेला
नदीको बगरमा
तिमी थोत्रो लालपूर्जा
खोज्दै हुनेछौ
जतिबेला हामी
पसीनाका मोतीसँग
धर्तीको सुगन्ध साट्नेछौं
भो कति ओढ्छौ?
त्यो धुइँसो परेको
खानदानी बाघको छाला
मिल्काऊ अब त्यो
ब्वाँसाको देहबाट।
अब त
गोब्रेकीराहरूको
मेटामोर्फोसिस भएको छ
तिनले चिन्नेछन्
तिनका पुर्खाका पसिनाको गन्ध
र खोज्नेछन्
मक्किएका हड्डीहरू
जो बिस्तारै,
दधिचिका हड्डी बन्नेछन्
बन्द गर तिम्रा आसुरी कृत्यहरू।
२५ अगस्त, २०१३
सान सेबाष्टियन, स्पेन।
No comments:
Post a Comment