छायाँ र प्रतिविम्बहरू

छायाँ र प्रतिविम्बहरु

शुक्रवारे यो साँझ,
गिर्जाघरको घन्टाले ६ थप्पड लगाउँछ,
उरुम्या नदी किनार१मा लहरै चम्किन्छन् रंगीन प्रकाशहरु
लहरहरुमा हल्लिन्छ चन्द्रमाको प्रतिविम्व
र खिस्स हाँस्छ एक बादलको चोइटो ।

छायाँ र चराहरुको देशकी ए केटी!
हिमाल जस्तै कञ्चन हाँसो छ तिम्रो
अवसादका धर्साहरुहरुलाई यो जललहरीमा
कोन्चाको खाडी२तिर हुत्याइदेउ ।
हिमालको काखबाट एउटा केटो आइरहेछ
भन्छ, उचाइतिर लम्कनु मात्र जीवन हो ।
ए खजुर जस्तो मधुर बाणी भएको केटा!
सम्झ कि उचाइहरु सधै रहँदैनन्
ती कहिले ढल्छन् र कहिले उन्नत हुन्छन् ।
जीवन त यिनी उरुम्याका छालहरुले नै प्रतिबिम्वित गर्छन् ।

खजुर र उँटको देशको एक मोहम्मद भक्त
आँखा चम्काउँदै दारी सुम्सुम्याउँछ र ऐलान गर्छ
धर्मको पालनामा नै छ मानवको पहिचान
ए धर्मका पदयात्री!  किन पादरी पनि छैन लोभमुक्त
मानवधर्म नै सबैभन्दा फराकिलो छैन र ?
भर्खर पादरी निस्केको छ गिर्जाघरबाट
तर चन्द्र पिरामिडको देशकी एक मधुवाणी केटी
पादरी भन्दा कति निश्छल र निश्कलंक छे ।

उरुम्या नदीमा तैरिएका छन् केही पहेंला पातहरु
जीवन एउटा पात न हो
कोन्चा खाडी हुँदै एकदिन मिसिनु छ उत्तर सागरमा
पोतेका छौं हामीले थरिथरिका पहिचान र सिंगार – हाम्रा नाम र अनुहारमा
कोही चाहँदैन आफ्नो नाम झुसिल्किरा, शंखेकीरा वा स्याल राख्न
भीष्म३, मार्टिन४, मारिया५, अहमद६, क्रिष्टल७.. वाह! कति सुन्दर नामहरु
तर काला पर्दाहरुले साँघुरो पारेका हाम्रा मनहरु
हरेक बिहान एकसाथ गीता, कुरान, बाइबल र धम्मपद गुञ्जाएर पनि
उज्यालो ज्योतिमा हाँस्न भन्दा
पुराना घाउ कोट्याएर दुख्न मात्र किन जान्दछन् ?

एक दिन अनन्तमा बिलाउनु नै छ
उरुम्या नदीमा तैरिएका समुद्रगामी यी पातहरु झैं
ओ बुलबुल र छायाँको देशकी केटी
यो बिषाद किन?
आऊ ! बगौं सबै सँगै
यी छालहरुझैं, यी त्वरित पातहरुझैं
चन्द्रकिरणको प्रकाशमा
उज्याला मनहरुको खोजीमा..निरन्तर.....।

सान–सेवाष्टियन, उरुम्या नदी किनार, स्पेन
२०६८।११।१५
२७ फेब्रुअरी, २०१२
शब्दार्थः
 १. उरूम्या नदीः सान सेवाष्टियन शहरलाइ बेष्टिट गर्दै उत्तरको कोन्चाको खाडीमा मिसिने नदी
२. कोञ्चा खाडीः स्पेनको उत्तर-पूर्वी कुनामा अवस्थित समुद्रसँग जोडिने एक समुद्री चोंसो जुन सान-सेबाष्टियन शहरको श्रृंगार हो ।
३. भीष्मः दृढ प्रतिज्ञा भएको ।
४. मार्टिनः राजा
५. मारियाः येशुकी आमाको नाम (मारियम)
६. अहमदः इस्लामहरूमा अहमदीय मतका प्रवर्तक मिर्जा गुलाम अहमदको नामबाट लिइएको ।
७. क्रिष्टलः स्फटिक
(यी सबै नामहरू प्रचलित र वास्तविक समेत हुन्)